சசிகுமாரின் ‘ஃப்ரீடம்’ ரிலீஸ் எப்போது? - படக்குழு விளக்கம்
Anitha Marikumar 
சென்னை: சசிகுமார் நடிப்பில் உருவான ‘ஃப்ரீடம்’ படத்தின் வெளியீடு தள்ளிவைக்கப்பட்ட நிலையில் அப்படம் விரைவில் வெளியாக உள்ளதாக படக்குழு தெரிவித்துள்ளது.
சசிகுமார் நடித்துள்ள ‘ஃப்ரீடம்’ ஜூலை 10-ம் தேதி வெளியாகும் என முதலில் அறிவிக்கப்பட்டது. அதற்கான விளம்பரங்கள், ஏற்பாடுகளை படக்குழு தீவிரமாக செய்து முடித்த நிலையில், படத்தின் ரிலீஸ் தேதி அன்று பொருளாதார பிரச்சினை காரணமாக படம் திரையரங்குகளில் வெளியாகவில்லை. இதனையடுத்து ட்ரெய்லர் ஏற்படுத்தியிருந்த எதிர்பார்ப்பு காரணமாக படத்துக்கு டிக்கெட் முன்பதிவு செய்த பலரும் ஏமாற்றம் அடைந்தனர்.
இந்த நிலையில் படம் ஒத்திவைக்கப்பட்டது குறித்து விஜய் கணபதி பிக்சர்ஸ் நிறுவனம் வெளியிட்டுள்ள அறிக்கையில், “எதிர்பாராத சூழல்கள் காரணமாக ஒத்திவைக்கப்பட்ட ‘ஃப்ரீடம்’ திரைப்படம் விரைவில் வெளியாகும்” என்று தெரிவிக்கப்பட்டுள்ளது.
சத்யசிவா இயக்கியுள்ள இப்படத்தில் சசிகுமாருடன் லிஜோ மோல் ஜோஸ், சுதேஷ் நாயர், மாளவிகா, போஸ் வெங்கட், ரமேஷ் கண்ணா உள்ளிட்ட பலர் நடித்துள்ளனர். இலங்கையிலிருந்து தமிழகத்துக்கு புலம்பெயர்ந்த தமிழர்களின் உண்மையைக் கதையை இப்படம் பேசுவதாக இயக்குநர் பேட்டி ஒன்றில் கூறியிருந்தார்.
