ராமதாஸ் வீட்டில் பொருத்தப்பட்டிருந்த ஒட்டுகேட்புக் கருவி காவல் நிலையத்தில் ஒப்படைப்பு
Anitha Marikumar 
விழுப்புரம்: திண்டிவனம் அடுத்த தைலாபுரத்தில் உள்ள தனது வீட்டில், நாற்காலியில் ஓட்டுகேட்புக் கருவி பொருத்தப்பட்டிருந்ததாக ராமதாஸ் தெரிவித் திருந்தார். கட்சித் தலைவர்கள் மற்றும் பாமக நிர்வாகிகளை சந்தித்து அவர் ஆலோசனை நடத்தும் இடத்தில் பொருத்தப்பட்டிருந்த ஒட்டு கேட்புக் கருவி கடந்த 9-ம் தேதி கண்டுபிடிக்கப்பட்டது.
இதுகுறித்து கிளியனூர் காவல் நிலையம் மற்றும் விழுப்புரம் சைபர் க்ரைம் போலீஸில் கடந்த 15-ம் தேதி பாமக தரப்பில் புகார் அளிக்கப்பட்டது. இது தொடர்பாக கிளியனூர் போலீஸார் வழக்கு பதிவு செய்தனர். இந்நிலையில், கிளியனூர் காவல் நிலைய ஆய்வாளர் கலையரசியிடம் ஒட்டுகேட்புக் கருவியை தலைமை நிலையச் செயலாளர் அன்பழகன் நேற்று ஒப்படைத்தார்.
இதுகுறித்து போலீஸார் கூறும்போது, “ஒரு பேட்டரி, ஒரு சிம் கார்டு, ஒரு மென்பொருள் அடங்கிய பலகை மட்டும் ஒப்படைத்துள்ளனர். தனித்தனியாக பிரித்து கொடுத்துள்ளனர். ஒட்டு கேட்புக் கருவியை முழுமையாக ஒப்படைக்கப்படவில்லை” என்றனர்
